बिजय तामाङ्ग विगत २ वर्षदेखि राजधानीमा मजदुरी गर्दै आइरहेका थिए । काठमाडौंको धापासीमा डेरा गरेर बस्दै आएका उनको ७ महिना अगाडि एक युवतीसँग भेट भयो ।
युवती थिइन् स्थायी घर गोरखा भएकी पूर्णिमा बिक । उमेर ३० वर्ष पार गरिसकेकी पूर्णिमा श्रीमान्सँग सम्बन्ध बिग्रिए पछि काठमाडौं आएकी थिइन् ।
घर बनाउने मजदुरका रुपमा काम गर्ने उनीहरुबीच दैनिकजसो भेटघाट हुन थाल्यो । भेटघाट बाल्किएपछि दुवैजनाले सँगै बस्ने निर्णय गरे ।
राति सँगै (लिभिङ टुगेदरमा) बस्ने उनीहरुले दिउँसो काम गर्दा भने फरक फरक ठाउँमा जानु पर्थ्यो । यस्तोमा पूर्णिमाको भेटघाट आफूसँग काम गर्ने अन्य पुरुषसँग पनि हुन थाल्यो । जबदेखि उनले अन्य पुरुष साथीसँग संगत बढाइन्, बिजयको कोठामा आउजाउ कम गर्न थालिन् ।
विवाह नभए पनि बिजय उनीसँग आफ्नो श्रीमतीको जस्तै व्यवहार गर्थे । दुवैजना साँझ सँगै रक्सी पिउँथे । पूर्णिमाले कोठामा नआएको दिन झगडा हुन्थ्यो । साँझ रक्सी पिएपछि झगडा गर्ने उनीहरु विहान हुँदा मिलिसकेका हुन्थे ।
तर नयाँ वर्षको दोस्रो दिन (वैशाख २ गते) भने पूर्णिमाका लागि अन्तिम भयो । दिउँसाभरि काम गरेर साँझ घर फर्किने बेला पूर्णिमा र बिजयले झापासी नजिकैको एक भट्टीमा रक्सी पिए । रक्सी पिएपछि झगडा हुने उनीहरुको क्रम त्यो दिन पनि दोहोरियो ।
रक्सी पिएर पूर्णिमा आफ्ना अन्य साथीसँगै जान खोज्दै थिइन् भने बिजयले जसरी पनि कोठामा लैजान उनलाई डोर्याउँदै थिए । धापासी हाइटमा पुग्दा भने बिजयले पूर्णिमामाथि ढुङ्गाले हिर्काए ।
रिसको झोकमा पूर्णिमालाई ढुङ्गाले हिर्काएपछि बिजय आफ्नो कोठातर्फ लागे । कोठामा गएर खाना पकाइ खाएर सुते । तर उनले हानेको ढुङ्गो लागेर ढलेकी पूर्णिमाको भने आधा घण्टामै मृत्यु भइसकेको थियो ।
आइतवार राति ९ः३० बजेतिर पूर्णिमा मृत अवस्थामा फेला परेकी थिइन् ।
प्रहरीले पूर्णिमाको हत्यामा संलग्न बिजयलाई सोमवार विहान उनकै कोठाबाट पक्राउ गरेको छ ।
लिभिङ टुगेदरको दुःखद परिणाम
महानगरीय प्रहरी परिसर काठमाडौंका प्रमुख प्रहरी बरिष्ठ उपरीक्षक (एसएसपी) विश्वराज पोखरेल यो घटनालाई लिभिङ टुगेदरको दुःखद परिणाम ठान्छन् ।
‘एक–अर्काबारे राम्ररी नजानेका, नबुझेका पुरुष–महिला ७ महिनादेखि सँगै बसिरहेका थिए । उनीहरुको यस्तो बसाइ नै अपराधको कारक हो,’ एसएसपी पोखरेल भन्छन् ।
पछिल्लो समय काठमाडौंमा भएका हत्या तथा बलात्कारका घटनामा पनि लिभिङ टुगेदरको परम्परा कारकको रुपमा देखिएको उनको भनाइ छ ।
‘केही समय मिलेर सँगै बस्ने । कुरा बिग्रिन थाल्यो भने एक–अर्कामाथि हिंसा गर्ने समस्या बिकराल बन्दै गएको छ,’ एसएसपी पोखरेल भन्छन्, ‘पछिल्लो काठमाडौंमा बलात्कार र हत्याका घटना बढ्दै जानुमा लिभिङ टुगेदर पनि एक जटिल कारणका रुपमा देखिएको छ ।