eNepal

किन लेख्दैछु म मेरो बलात्कारीलाई यो चिठी ?

प्रस्तुत आलेख ग्रेस सिरिल नामक भारतीय बिधार्थी एवं लेखिकाको प्रकाशीत बहुचचर्चित लेखको नेपाली अनुवाद हो ।
गुरुत्वाकर्षणले धर्तीलाई मेरो पैँतालामुनि बन्धि बनाएको छ भने आकाशले मेरो भाग्य प्रतिबिम्बित गरिरहेको छ । मेरो जीवनको यस मृत्यु ब्यूँताउने पलमा चलिरहेको यो दुष्ट हावालाई म अनुभव गर्छु र सोच्दछु, यो अझै कहिलेसम्म ? कति महिलाहरुले यो भोग्नपर्यो होला ? डेजी इरानीजस्ती कुशल कलाकारको कथाले मभित्र मिश्रित भावना पैदा गर्छ र यस उपनिवेशको चक्र भत्काउनका लागि म मौन रुपमा कराउँछु । कसरी एउटा लोग्नेमान्छेले ६ वर्षीय निर्दोष केटीको बलात्कार गर्न सक्छ ? किन ती बच्चीले यतिका वर्षसम्म त्यसको आघात सहनपर्यो ? एउटी ६ वर्षीय केटी सामान्य बन्नका लागि हरेक दिन सोचको खाडलमा पुरिएको कल्पना गर्नुहोस् ।
उनको कथा पढिसकेपछि म उनीसँग अझै नजिकिएको छु किनकी हामी दुवै आँधीपछिको त्यो शून्यता हौँ जसले केही छिनमै हाम्रा मीठा सम्झनाहरु हाम्रो जीवनबाट सोरेर लगिदियो । हामी दुवै गौँथलीको मिठो संगीतमा लुकेका अल्मलिएका विकार हौँ । मेरो दुखको साथी बन्न पुगेका डेजीबाट प्रेरित हुँदै, मेरो रोदन र रोष पोखी डरबाट उन्मुक्ति पाउँदै यही क्षणमा बोल्ने साहस निकालेकी छु ।

बलात्कारी, तेरो लागि चिठ्ठी लेखेको छु ।
सुन्, मैले तँलाई माफी दिएँ । यसको अर्थ के हो म जान्दिन न म माफीको अर्थ नै बुझ्दछु तर मैले तँलाई माफी दिएँ । त्यो दिन सम्झदाँ म अझै त्रसित हुन्छु । त्यो दिनमा कति सजिलै विलिन हुन्छु । मेरो आत्मा च्यात्न गरेको तेरो हर्कतले ममा आउने भावनाको बाढीले हरेक दिन मेरो अस्तित्व पुरिन्छ । तँ बुझ्छस् पनि आफ्नै छालामा आफु असुरक्षित हुनुको पीडा ? १५ वर्षमा घरमा एक्लो हुनुको डर ? मध्यरातमा आत्तिएर उठ्नु वा जिन्दगीको लागि तड्पिनुको अर्थ बुझ्छस् ? त्यो भयानक डरबाट निस्किन मलाई हप्तौं लाग्यो, दर्दनाक र लामा हप्ताहरु । म बलात्कृत भएको भिडियोको दृश्य मेटाउनका लागि तँसँग गरेको मेरो अनुरोधको भय तैँले सोच्न पनि सक्छस् ? मैले नचाहँदानचाहँदै थप्पड लगाउँदै मेरा हातहरु बाँधेर त्यो भिडियो हेर्न लगाइस् । बेहोस नहुञ्जेलसम्म मलाई तर्साइरहिस् । तँ बुझ्छस् पनि, एक्लै बस्दा पनि डर कोही हुँदा पनि डर हुनुको अनुभव ?

त्यो पीडा मैले मेरो दिमागबाट हटाउन नसकेर मेरो अन्तिम परीक्षामा म अनुत्तीर्ण भएँ । तँजस्तो दुष्ट मानिस भएन भने यो संसार सायद अधुरै रहन्छ । बलात्कारको बारेमा थाहा पाउँदा मैले सोचेकी पनि थिइन, यो मलाई आइपर्छ भनेर । मेरी आमाले मलाई भन्नुभएको थियो कि सावधान नअपनाउने केटीलाई बलात्कारको बज्रपात आइलाग्छ । बलात्कृत महिला काम नलाग्ने हुन्छन् भनेर पनि उहाँले नै भन्नुभएको थियो । तेरो दुष्टताले, मेरो जीवनको वास्तविकताबाट म टाढिन थालेँ । तँ जर्बजस्ती घरभित्र छिरेको त्यो दिन मलाई अझ याद छ । मेरो कोठामा लगेर तैंले आफ्नो कपडा उतार्दा ममाथि बज्रिएको थप्पडको आँकलन गर्न पनि मैले भ्याएकी थिइन । फोन निकालेर आफ्नो बहादुरी रेकर्ड गरेको तेरो हकर्त मैले अझै भुलेको छैन ।

जर्बजस्ती मेरो लुगा त च्यातिस् तर त्यो दिन तैंले मेरो लुगासँगै मेरो आत्मा पनि च्यातिस् जुन कहिल्यै निको हुने छैन । म चिच्याउँदा मेरो मुखमा कोचेको रुमाल मलाई जर्बजस्ती मौन बनाइएको एउटा प्रष्ट चित्र हो । मलाई अझ याद छ तैंले मेरो हात बाँधेर घण्टौँसम्म यातना दिएको । तँमाथि जाइलाग्दा चुरोटले पोलिदिएको अझै याद छ । तैंले मेरो चैनसँगै अभिव्यक्ति गर्ने क्षमता पनि लगिस् । मेरो मौनता बुझ्न नसकी मेरा साथीहरु मबाट टाढा भए । मलाई कसैले बुझ्न सकेनन् र म एक्लो भएँ ।
तैंले दिएको धम्कीका कारण मैले यसबारे कोहीसँग भन्न सकिन । भिडियो सारा संसारलाई देखाइदिन्छु र मेरा बाआमालाई सकाउँछु भन्ने तेरो धम्कीलाई मैले पत्याइरहें । मेरो मिल्ने साथीलाई यसबारे भन्न खोज्दा उल्टो उसलाई मविरुद्ध खन्याइस् ।

परिवारलाई यसबारे भन्ने मात्र सोच्दा पनि म तर्सिन्थे । समयसँगै यस्तो घाउ बिलाउँदै त जाला तर कहिल्यै निको हुन्न । यो घाउको चोट अझै मसँग बाँकी छन् र बाँकी छस् तँ । ध्यानको कक्षा र लेखेर मैले आफुलाई केही सम्हाल्न त सम्हालें तर म अन्तर्मुखी बन्दै गएँ र कोहीसँग बस्नुमाभन्दा एक्लै बस्न बढी सजिलो महसुस गर्न थालें । म अझै उस्तै छु र उस्तै रहन्छु । लेखेर मैले मेरो मनको शान्ति केही हदसम्म भेटें । यसकै कारण चिन्ताबाट केही राहत मिल्यो र यति भन्न सक्छु कि त्यो दिनबाट केही अघि बढ्न सकें ।
यति हुँदाहुँदै पनि सबैभन्दा खराब चिज मबाट टाढिन सकेको छैन । मेरो लेखाइमा तँ आइरहिस् । तँ मेरो जिन्दगीको हिस्सा नै बनिस् र म मरेसम्म बनिरहने भइस् । तेरो कुकर्मबाट केही सकारात्मक कुरा पनि निकाल्न खोज्छु तर सक्दिन । सक्छु पनि कसरी ? तैंले जे गरिस्, गलत नै गरिस् र यो एउटा नमिठो सत्य मसँग बसिरहने नै भयो । तँ जान्दैनस् कि तँ एउटा बलात्कारी होस् र तैंले मेरो जिन्दगी कहिल्यै नफर्किने गरी बदलदिस् । त्यो घटनाको यत्तिका वर्षपछि पनि म मेरो सिरानी भिज्ने गरी रोइरहेकी हुन्छु । म माया अनुभव गर्न खोज्छु तर तैंले दिएको चोटको कारण म माया अनुभव गर्न पनि काबिल रहिन ।
हो, तैंले मेरो एक हिस्सा नष्ट नै गरिदिस् र पनि म तँलाई माफी दिन्छु ।
थाहा छ किन ? किनकी तँ मेरो जिन्दगीको हिस्सा बन्न लायकको छैनस् । म तँलाई माफी दिन्छु किनकी धेरै भयो डरसँग बाँचेको अब सक्दिन । मैले तँलाई माफी दिनुको अर्थ यो होइन कि तैंले मलाई जे गरिस् त्यो सही थियो । तँ दुष्ट नै होस् र छ वर्षअघि मसँग गरेको दुष्कर्मले तैंले जे गरे पनि मलाई न्याय हुन छैन । तँ जस्तो राक्षसलाई रोक्न जरुरी छ । अरु निर्दोष बालिकासम्म तँ पुग्नुअघि, अरु डेजी इरानी बन्नुअघि तँलाई रोक्नपर्नेछ । नत्र अरु दुखी आत्मा जन्मिरहनेछन् र तैंले दिएको पीडा हामीले सधैँ बिना अर्थ भोगिरहनपर्नेछ । हामी टुक्रिएका मनलाई बढाइचढाइ गरिरहनेछौँ, अपराधलाई सनसनी बनाइरहन्छौँ र विरोधलाई फेसनजस्तो बनाइरहन्छौँ किनकी तिमीहरु लोग्नेमान्छे–आधुनिक हिरोहरु, तिमीहरुको पौरस्यको हतियारको प्रयोगले हामीलाई जिउन दिने छैनौ ।

सुन दिदीबहिनी हो, जसले यस्तो दुष्टता भोग्नपर्यो, यो ठिक होइन भन्ने कुरा नबिर्सिनु । तिम्रो योनी कुनै राक्षसको पेवा होइन । तिमी एक्लै छैनौ । अर्को डेजी इरानी नबन । मजस्तो अर्को केटी नबन । आवाज उठाऊ । यसरी चिच्याउ कि तिम्रो चिच्याहटले ती दुष्टहरु थर्कमान हुन् । तिम्रो गल्ती वा दोष केही छैन यसकारण तिम्रो शरीर विरोधका लागि ढकेल र सबैसामु उदाँगो बनेर देखाऊ । जति रुनु छ रोऊ, तर रुन सकेपछि क्रोधले भरिएर जाग । आफुलाई सकाउने बाटो रोज्नुको सट्टा, यो संसार तिम्रा खुट्टाले किल्चिउ किनकी तिमी शक्तिशाली छौ । मैले मेरो आत्मा मारें र यो जिन्दगीको लागि अफसोस मानेर बसिरहें तर तिमीहरु पछि नपर्नू । नछोड तिनीहरुलाई । देखाइदेऊ उनीहरुलाई को बलियो र शक्तिशाली हो भनेर ।
साभारः हाम्रो पात्रो

Related posts

ग्रामपियन्स यात्रा सस्मरण- ग्रामपियन्स जंगलमा ॐकार ध्वनिको गुन्जन

Manoj Poudyal

काठमाडौं महानगरपालिकाको मेयरमा स्वतन्त्र उम्मेदवार वालेन्द्र साहको अग्रता कायमै

Manoj Poudyal

दिदीबहिनी समाज भिक्टोरीयाले यस बर्षको अन्तर्राष्ट्रिय महिला दिवस बिशेष तरिकाले मनायो

Manoj Poudyal

विदेशबाट नेपाल आउने स्वदेशी तथा विदेशीसँग खोप कार्ड भए पीसीआर रिपोर्ट नचाहिने

Manoj Poudyal

अभिनेता पल शाह आफैं प्रहरीसमक्ष उपस्थित हुँदै

Manoj Poudyal

नायक पल शाहविरुद्ध नाबालिगमाथि यौनजन्य अपराध गरेको आरोपमा जाहेरी दर्ता

Manoj Poudyal