अन्तर्राष्ट्रिय क्रिकेट खेल्न थालेको २२ वर्षपछि नेपालले एक दिवसीय स्ट्याटस पाउने भएको छ । जिम्बावेमा भएको आईसीसी विश्वकप छनोटअन्तर्गतको प्लेअफ खेलमा पपुवा न्यु गिनी (पीएनजी) माथि ६ विकेटको जित र नेदरल्यान्डले हङकङमाथि ४४ रनको जित निकालेसँगै नेपालले यस्तो ऐतिहासिक सफलता हात पारेको हो ।
जिम्बावेमा जारी छनोट खेल सकिएपछि औपचारिक रूपमा नेपालले एक दिवसीय मान्यता प्राप्त गर्ने देशमा समावेश हुनेछ । त्यसपछि नेपालले सन् २०२२ सम्मका लागि एक दिवसीय मान्यता पाउनेछ ।
यसअघि नेपालले टी–२० क्रिकेटमा मान्यता पाएको थियो । सन् २०१४ मा बंगलादेशमा भएको विश्वकप टी–२० खेलेको नेपालको सो अन्तर्राष्ट्रिय टी–२० मान्यता सन् २०१५ मा गुमाएको थियो । सन् १९९६ मा नेपालले आईसीसीको एसोसिएट स्ट्याटस पाएको थियो ।
नेपाली टिमका प्रशिक्षक जगत टमाटा र कप्तान पारस खड्काले जिम्बावे प्रस्थान गर्नुअघि नै नेपाली टिमको लक्ष्य शीर्षभित्र पर्दै एक दिवसीय मान्यता लिने रहेको बताएका थिए । तर, शीर्ष ६ भित्र पर्न नसके पनि नेपाल प्लेअफमा पीएनजी र हङकङलाई पछि पार्दै एक दिवसीय मान्यताको हकदार बनेको हो । यूएई र स्कटल्यान्ड शीर्ष ६ भित्र परेसँगै नेपाल, हङकङ र पपुवा न्यु गिनीमध्ये एक टिमले एक दिवसीय मान्यता पाउने थियो । जसमा नेपाल ‘लक्की’ साबित भयो ।
ऐतिहासिक उपलब्धि हात पारेसँगै एकदिवसीय मान्यता पाउने राष्ट्रले आईसीसीको वरीयतामा रहनुका साथै ठूला प्रतियोगिता खेल्ने मौका पाउनेछ । यस्तै, आईसीसीबाट आउने आर्थिक सहायतामा वृद्धि हुनेछ । विश्वकप छनोटको समूह चरणमा भने नेपालको प्रदर्शन फितलो बनेको थियो । समूह चरणका सुरुवाती तीन खेल गुमाएको नेपालले हङकङमाथि ५ विकेटको जित निकालेसँगै नेपालको झिनो आशा पलाएको थियो ।
जिम्बावे वल्र्ड हरारियन्स स्पोर्ट्स क्लबमा बिहीबार भएको प्लेअफ खेलमा पीएनजीलाई ६ विकेटले पराजित ग¥यो । अर्काे खेलमा हङकङ नेदरल्यान्डसँग ४४ रनले पराजित भयो । पीएनजीले दिएको ११५ रनको सामान्य लक्ष्य नेपालले २३ ओभरमा ४ विकेट गुमाएर पूरा ग¥यो । नेपालको जितमा दीपेन्द्रसिंह ऐरीले उत्कृष्ट ब्याटिङ गर्दै अर्धशतकीय इनिङ्स खेले । दीपेन्द्र ५० रनमा नटआउट रहे । २३औं ओभरको अन्तिम बलमा दीपेन्द्रले छक्का प्रहार गरेर नेपाललाई जित मात्र दिलाएनन्, आफ्नो खातामा पनि ५० रन पूरा गरे । दीपेन्द्रलाई आरिफ शेखले २६ रन बनाएर साथ दिए ।
कप्तान पारस खड्काले २० रन बनाए । ओपनर ब्याट्सम्यानले पीएनजीविरुद्धको खेलमा पनि राम्रो सुरुवात गर्न सकेन । ओपनर ज्ञानेन्द्र मल्ल १ रनमा आउट हुँदा अनिलकुमार शाह ९ रनमा पेभिलियन फर्किए । रोहितकुमार पौडेल ३ रनमा नटआउट रहे । पीएनजीका नोरमान भुनवाले २ तथा अली नाओ र जोन रेभाले समान १–१ विकेट लिए ।
यसअघि टस हारेर पहिले ब्याटिङ गरेको पपुवा न्यु गिनीले २७ दशमलव २ ओभरमा सबै विकेटको क्षतिमा ११४ रन मात्रै बनाउन सक्यो । पीएनजीका कुनै पनि खेलाडीले नेपालको कसिलो बलिङसामु राम्रो खेल्न सकेनन् । कार्लस अमिनी १९ र जासन किलाले १५ रन जोडे । किप्लिन डोरिगा र सेसी बाउले समान ११ तथा कप्तान असद भाला र चड सोपरले समान १० रन बनाए ।
नेपालका सन्दीप लामिछाने र दीपेन्द्रसिंह ऐरीले उत्कृष्ट प्रदर्शन गर्दै समान ४–४ विकेट लिए । दीपेन्द्रले ४ दशमलव २ ओभर बलिङ गर्दै १४ रन खर्चेर ४ विकेट लिए । सन्दीपले ८ ओभर बलिङ गर्दै २९ रन खर्चेर ४ विकेट लिए । सोमपाल कामी र करण केसीले समान १–१ विकेट लिए । सुपर सिक्सका शीर्ष दुई टोलीले सन् २०१९ को विश्वकपमा स्थान बनाउनेछन् । प्लेअफमा पुगेका चारमध्ये दुई टोली शीर्ष डिभिजनमा यथावत रहनेछ । पुछारका दुई टोली भने रेलिगेसन हुँदै डिभिजन–२ मा झर्नेछन् ।
