धरान उपमहानगरपालिका देशभरका उपमहानगरपालिकाहरुमध्ये उत्कृष्ट भएको छ ।
नगर विकास कोषले ऋणप्रवाह गरेका देशभरिका नगरमध्ये धरान उपमहानगरपालिका उत्कृष्ट उपमहानगरका रूपमा पुरस्कृत भएको हो । कोषको लगानीमा निर्माण भएका आयोजनाहरूको सफल कार्यान्वयन, सञ्चालन तथा व्यवस्थापन गर्न सकेको भन्दै कोषको ३० औं वार्षिकोत्सव समारोहमा अर्थमन्त्री ज्ञानेन्द्रबहादुर कार्कीले धरान उपमहानगरलाई पुरस्कार प्रदान गरेका थिए ।
कोषले धरानसहित विराटनगर, भरतपुर महानगर, सिद्धार्थ नगरपालिकालाई समेत उत्कृष्ट कार्य सम्पादन गरेको भन्दै पुरस्कृत गरेको हो । विराटनगरको बसपार्क निर्माणका लागि कोषले ८ करोड ४७ लाख रूपैयाँ र सडक क्षेत्रको विकास निर्माणका लागि पनि कूल लगानीको ११ प्रतिशत रकम लगानी गरेको छ ।
कोषको लगानीमा निर्माण भएका आयोजनाहरूको सफल कार्यान्वयन, सञ्चालन तथा व्यवस्थापन गर्न सकेको भन्दै महानगर पुरस्कृत भएको विराटनगर महानगरका मेयर भीम पराजुलीले बताए । आफ्नो कार्यकालमा पाएको यो उपलब्धिले काम गर्न अझै उत्साह थपेको उनले बताए ।
