“चोट के हो ब्यथा के हो “, ” जति चोट दिन्छौ देउ मायालु “, “फुल झरे पनि काँडा झर्दैन ” जस्ता दर्जनौ कालजयी गीतका गीतकार एवं मुक्तककार सुवासचन्द्र ढुंगेलले ‘मुक्तकको कथा’ कार्यक्रम लिएर आएका छन् । ‘सुवासचन्द्र ढुंगेल अफिसियल’ युट्युब च्यानलबाट प्रशारण हुने उक्त कार्यक्रम ‘मुक्तकको कथा’ हरेक शुक्रबार प्रसारण हुन् गइरहेको छ।
गीतकार ढुंगेल केही वर्षयतादेखि मुक्तक विधामा सक्रिय छन् । आफ्नो लेखन यात्राको सुरुवात गीतबाट गरेर उनी पछिल्लो समय मुक्तकमा सक्रिय भएका हुन् । उनका अनुसार यस कार्यक्रमलाइ ५२ हप्ता सम्म निरन्तर रुपमा संचालन गर्ने योजना रहेको बताएका छन्।
भक्तपुर सांगीतिक समाजका सचिव अल्बर्ट बज्राचार्यको परिकल्पना र निर्देशन रहेको ‘मुक्तकको कथा’ को छायाँकन र सम्पादन प्रणय भुजू, व्यवस्थापन समन ढुंगेल र उद्देश्य ढुंगेल तथा सहयोगी भूमिकामा रिचिन दुवाल रहेका छन् । भिडियोका लागि पार्श्व आवाज किरण सुवालले दिएका छन् । पिक्सेल प्रोडक्शन नेपालले यसको पोस्ट प्रोडक्शन गरेको छ ।
एक समारोह बीच यस कार्यक्रमको औपचारिक रुपमा सुरुवात गर्दै भक्तपुर सांगीतिक समाजका अध्यक्ष प्रवीण शाही, कार्यक्रम निर्देशक अल्बर्ट बज्राचार्य र सर्जक सुवासचन्द्र ढुंगेलले भक्तपुरमा साहित्य र संगीतको विकास क्रमका बारेमा स्पष्ट पारेका थिए । कार्यक्रमबारे सर्जक ढुंगेलले प्रकास पार्दै ‘मुक्तकको कथा’ सुन्दा अनौठो लागे पनि मुक्तकहरु र तीनको मर्ममा आधारित कथा समेत प्रस्तुत गरिने भएकाले यो नाम राखिएको जानकारी गराएका थिए ।
