ब्रिसबेन, अस्ट्रेलिया। सन् २०३२को ओलम्पिक गेम्स अस्ट्रेलियाको ब्रिसबेनमा हुने भएको छ।
हालसम्म अस्ट्रेलियामा दुईपटक ओलम्पिक आयोजना भएको थियो। यसअघि सन् १९५६ मा मेलवर्न र २००० मा सिड्नीमा ओलम्पिक आयोजना भएको थियो भने यसपाली अस्ट्रेलियाको ब्रिसबेनमा तेस्रो पटक ओलम्पिक हुने भएको अन्तर्राष्ट्रिय ओलम्पिक काउन्सिल (आइओसी)ले जनाएको छ।
बुधबार टोकियोमा सन् २०३२ को ओलम्पिक आयोजक छान्न भएको भोटिङमा ब्रिसबेनको पक्षमा बढी मत आएको हो। त्यसअघि सन् २०२४ मा फ्रान्सको पेरिस र सन् २०२८ मा अमेरिकाको लस एन्जलसमा ओलम्पिक आयोजना हुनेछ। कोरोना भाइरसले प्रभावित सन् २०२० को टोकियो ओलम्पिक एक वर्ष ढिलो गरी पर्सी बिहीबारदेखि सुरु हुँदैछ। त्यस्तै यो ओलम्पिकका लागि ५ बिलियन अमेरिकी डलर खर्च लाग्ने अनुमान गरिएको छ।