चुनाव नजिकिदै गर्दा गैरआवासिय नेपाली संघ अष्ट्रेलियाले सदस्यता वितरण सुरु गरेको छ । यो संगै शनिवार मध्यरातबाट सदस्यताका लागि अनलाईन फारम खुल्ला गरिएको छ।
हाल एआरएनए अष्ट्रेलियाको १२ हजार सदस्य छन् । आगामी कार्यकालका लागि जुलाई ३१ तारिख शनिवार चुनावको मिति तय भएको छ । त्यसैगरी जुन १० तारिखसम्म सदस्यताको फारम भरिसक्नुपर्नेछ ।
यसपाली सदस्यताका लागि २५ डलर शुल्क तोकिएको छ। एनआरएनए अष्ट्रेलियाका प्रवक्ता नन्द गुरुङका अनुसार यसपाली डेबिट र क्रेडिट कार्डबाट मात्रै रकम तिर्न सकिने व्यवस्था गरिएको छ । एउटा कार्डबाट आफु र नजिकका परिवारका ४ जना सदस्य सम्मको शुल्क तिर्न मिल्ने व्यवस्था गरिएको गुरुङले बताउनुभयो।
यस्तै अष्ट्रेलियाका टेम्पोरेरी रेसिडेन्ट भिषा टिआर, पिआर, नागरिक भइसकेका नेपालीमुलका मानिसले सदस्यता लिन सक्नेछन् । विद्यार्थीले भने मतदान अधिकार नभएको एशोसियटस् सदस्यता लिन सक्नेछन । यसअघि सदस्य भइसकेकाहरुले समेत सदस्यता नविकरण गर्नका लागि सबै कागजात पेश गर्नुपर्नेछ । सदस्यताका लागि प्रकृयाको कुरा गर्ने हो भने एनआरएनए अष्ट्रेलियाले सदस्यताका लागि अनलाईन फारमको व्यवस्था गरेको छ जसका लागि यो थिच्नुहोस् ।
त्यसपछि सदस्यता फारमको मुख्य पेजमा गएपछि ६ वटा चरण पार गरेपछि दर्ता प्रकृया पुरा हुन्छ । सदस्यका लागि सुरुमै व्यक्तिगत मापदण्ड पुरा गरेपछि मात्रै व्यक्तिगत विवरण भर्ने अर्को चरणमा पुग्न सकिन्छ । फोन नम्बर र इमेल भेरिफिकेसन गरेपछि अर्को चरणमा गएर कागजपत्र अपलोड गर्न मिल्छ । इमेलमा आएको कोड भेरिफिकेसन गरेपछि मात्रै सदस्यता शुल्क तिर्न सकिनेछ।