eNepal

आज लकडाउनको ७६ औ दिन के गर्दैछन घरभित्र नेपाली

जेठ २५ आइतबार -हप्तौं भयो घरभित्र बस्नुपरेको । घरभित्र के गर्दै बस्ने ? कसरी दिन कटाउने ? मोबाइल कति चलाउने ? टिभी कतिबेर हेर्ने ? कहिलेसम्म सुत्ने ? के गफ गर्ने ? धेरैलाई छटपटी भएको हुँदो हो । यही छटपटीले होला कोही भान्सामा पसेर थरीथरी परिकार बनाउन थालेका छन्।

कोही गमलामा फूल र सागसब्जी रोप्न थालेका छन् । कोही नयाँ-नयाँ हस्तकला बनाउन थालेका छन् । कहिलेकाहीँ असहज परिस्थितिले पनि सही काम गर्न उत्प्रेरित गर्छ । सम्भवत: अधिकांशको दैनिकी यस्तै सकारात्मक काममा मोडिएको छ ।

हुन त लकडाउनको कारण जन-जीविका असहज बन्दैछ । धेरैले आय-आर्जन गुमाएका छन्, धेरैको रोजगारी खोसिएको छ। धेरैको उद्यम संकटमा छ । तर, यसको अर्को पाटो भने सकारात्मक छ । खासगरी लकडाउनले धेरैको घर-परिवारमा नयाँ परिवर्तन ल्याइदिएको छ ।

श्रीमान् पनि भान्सामा

हामीकहाँ श्रीमान् खासगरी पुरुषहरू भान्साको काममा उति सक्रिय देखिँदैन । भान्साको काम आमा वा श्रीमती वा छोरी वा बुहारीले गर्नुपर्छ भन्ने बुझाइ छ । त्यसैले सागसब्जी केलाउने, काट्ने, पखाल्ने, पकाउने, जुठो भाँडा माझ्ने, कुचो लगाउने, लुगा धुने जस्ता काममा पुरुष अलग बस्ने गर्छन् । लकडाउनमा भने पुरुषहरूलाई पनि यावत काममा खटाउने अनुकूलता मिलेको छ । कतिपय पुरुष आफैँपनि यस्ता घरायसी कामकाज गरेर परिवारलाई साथ दिइरहेका छन् । यसले दम्पतीबीच मेलमिलापको वातावरण पनि मिलाइदिएको छ ।

बालबच्चालाई व्यवहारिक ज्ञान

बालबच्चा विद्यालय जान पाएनन् वा पढ्न पाएनन् भनेर धेरैजसो अभिभावक पिरोलिएका छन् । जबकी विद्यालयमा उनीहरुले शैद्धान्तिक ज्ञान मात्र आर्जन गर्छन् । जीवनोपयोगी कुरा त घर परिवारबाट नै सिक्ने हो ।

लकडाउनको कारण घरमै बसेका बालबालिकाले आफ्ना परिवारलाई नजिकबाट नियाल्न पाएका छन् । आमाबुवाको कुरा सुन्न पाएका छन् । पारिवारिक कुरा बुझ्न पाएका छन् । साथसाथै घरको काममा सघाउने पनि गरिरहेका छन् । विद्यालयमा सरसफाई बस्नुपर्छ भनेर पढे, अहिले उनीहरु त्यसैको व्यवहारिक प्रयोग गरिरहेका छन् । कतिपय अभिभावकले बालबच्चालाई घरधन्दाको काम सिकाइरहेका छन्, बाली र बगैंचाको काममा खटाइरहेका छन् ।

योग-व्यायाममा जाँगर

घरमा कोही न कोही योग, ध्यान एवं व्यायाम गर्ने हुन्छन् । उनीहरूले परिवारका सदस्यलाई योग, ध्यानमा प्रेरित गर्न पाएका छन् । घरमा यत्तिकै बस्नुभन्दा व्यायाम गरौं, योग गरौं भन्ने जागरुकता पलाएको छ । श्रीमान, श्रीमती मात्र होइन, छोराछोरी समेत योग, ध्यानको अभ्यास गरिरहेका छन् ।

करेसाबारी वा बगैंचा बनाउने

लकडाउन नहुँदो हो त सहरीयाहरूको बगैंचा, बार्दली यति धेरै हराभरा हुने थिएन होला । अहिले धेरैजसोले बगैंचामा फूलहरू रोपिरहेका छन् । करेसाबारी बनाएर सागसब्जी रोपेका छन् । आफ्नै हातले रोपेको सागसब्जी खानुपर्छ भन्ने जागरण फैलिएको छ । यस्ता काममा घरका सबै सदस्यको सहभागिता पनि देखिएको छ ।

थरीथरी परिकार बनाउने

अहिले बजारका खानेकुराहरू सहजै उपलब्ध छैनन् । त्यसैले जिब्रोको तलतल मेट्न वा फुर्सदको क्षण सदुपयोग गर्न धेरैले आफ्नै भान्सामा थरीथरी परिकार बनाउने अभ्यास गरिरहेका छन् । मम, चाउमिन, जेरी, समोस, रसबरी लगायतका परिकार बनाइरहेका छन् । आफ्नो भान्सामा बनाइएका यी परिकारहरू शुद्ध र ताजा हुने नै भयो । भोलिका दिनमा पनि उनीहरूले परिवारमा यस्ता परिकार बनाउन सक्ने छन् ।

हस्तकलाको काम

घरमा बसिरहेको यो क्षणमा कतिपयले भने नयाँ-नयाँ सजावटका सामग्रीहरू, घरायसी सामग्रीहरू बनाइरहेका छन् । कागजको फूल, भास, ब्याग आदि बनाइरहेका छन् ।

रचनात्मक काम

त्यसैगरी कतिपय भने कथा, कविता लेख्ने, चित्र बनाउने काममा लागेका छन् । खासगरी बालबच्चाहरू यस्तै नयाँ नयाँ काममा रुचि देखाइरहेका छन् ।

Related posts

सुरु भयो धमाका २०७९ अष्ट्रेलिया टूर, सात शहरमा कार्यक्रम हुँदै

Manoj Poudyal

काठमाडौं महानगरपालिकाको मेयरमा स्वतन्त्र उम्मेदवार वालेन्द्र साहको अग्रता कायमै

Manoj Poudyal

दिदीबहिनी समाज भिक्टोरीयाले यस बर्षको अन्तर्राष्ट्रिय महिला दिवस बिशेष तरिकाले मनायो

Manoj Poudyal

विदेशबाट नेपाल आउने स्वदेशी तथा विदेशीसँग खोप कार्ड भए पीसीआर रिपोर्ट नचाहिने

Manoj Poudyal

अभिनेता पल शाह आफैं प्रहरीसमक्ष उपस्थित हुँदै

Manoj Poudyal

न्याभ एक्सिलेन्सी अवार्ड हुँदै, मनोनयन फारम भर्ने अन्तिम मिती ६ मार्च सम्म

Manoj Poudyal