१९ जेठ, काठमाडौं । देशका धेरै क्षेत्रका किसान धान खेतीका लागि ब्याड बनाउने तयारी गरिरहँदा भने उपत्यकाका किसानलाई भने रोपाईंको चटारोले छोइसकेको छ ।
काठमाडौं उपत्यकाको शहरी क्षेत्रमा जमिन खाली नभए पनि शहरदेखि केही टाढाका क्षेत्रमा किसानहरु खेतबारीमै ब्यस्त हुन थालिसकेका छन् । केही दिनयताको वर्षाले किसानलाई रोपाईं गर्न सजिलो बनाइदिएको छ ।
उपत्यकामा किसानले हाते ट्याक्टर वा कोदाली र कोदालोले खनेर रोपाईंका लागि खेत तयार गर्छन् । काठमाडौंको कागेश्वरी मनोहरा नगरपालिका मूलपानीका किसानहरु हिजोआज खेतमै भेटिन्छन् ।
बालकदेखि वृद्धसम्म खेत खन्ने, आली लगाउने, बिउ उखेल्ने र रोप्ने काममा व्यस्तछन् । भक्तपुरको चाँगुनारायण नगरपालिकाका किसानको दैनिकी पनि यस्तै छ ।